معروض للبيــعْ

بالمحكية اللبنانية

معليش يا ابني

إذا جوعانْ..

في عندي كتبْ..

قديش طَعْميتا عمرْ واحْزانْ.

في عندي قصايدْ بالشنطْ..

فيها عسلْ..

قمحْ.. وخبزْ..

وفيها غزل نسوانْ.

رحْ فـَتفتْ وْراقْ الكتبْ..

أعصرْ قَصايدْ بالصحنْ..

ما تجوعْ .. بيّــك شــو غـَني..

ومليانْ.

رح بيعْ خلجات القلمْ..

وجِبْلك قميص وبيجاما من الصوفْ

تا حسْ إنـّكْ مشْ بردانْ.

ورحْ حطْ عَ رصيف الزمنْ..

بسطاتْ مليانة نبضْ وحروفْ.

رحْ بيعْ حالي عالمكشوفْ..

تا اقشعكْ رضيانْ.

الناس هوني بتشتري

سيرة وقصصْ

وبتشتري الإنسانْ.